वासुदेवः
vāsudevah
skandah skandadharo dhuryo varado vāyuvāhanah | vāsudevo brihadbhānurādidevah purandarah || 49 ||
Śaṅkara
वसति वासयत्याच्छादयति सर्वमिति वा वासुः; दीव्यति क्रीडते विजिगीषते व्यवहरति द्योतते सूयते गच्छतीति वा देवः; वासुश्चासौ देवश्चेति वासुदेवः । छादयामि जगद्विश्वं भूत्वा सूर्य इवांशुभिः । सर्वभूताधिवासश्च वासुदेवस्ततः स्मृतः ॥ वसनात्सर्वभूतानां वसुत्वाद्देवयोनितः । वासुदेवस्ततो ज्ञेयो योगिभिस्तत्त्वदर्शिभिः ॥ इति उद्योगपर्वणि । सर्वत्रासौ समस्तं च वसत्यत्रेति वै यतः । ततः स वासुदेव इति विद्वद्भिः परिपठ्यते ॥ सर्वाणि तत्र भूतानि वसन्ति परमात्मनि । भूतेषु च स सर्वात्मा वासुदेवस्ततः स्मृतः ॥ इति च विष्णुपुराणे ।
vasati vāsayatyācchādayati sarvamiti vā vāsuḥ; dīvyati krīḍate vijigīṣate vyavaharati dyotate sūyate gacchatīti vā devaḥ; vāsuścāsau devaśceti vāsudevaḥ | chādayāmi jagadviśvaṃ bhūtvā sūrya ivāṃśubhiḥ | sarvabhūtādhivāsaśca vāsudevastataḥ smṛtaḥ || vasanātsarvabhūtānāṃ vasutvāddevayonitaḥ | vāsudevastato jñeyo yogibhistattvadarśibhiḥ || iti udyogaparvaṇi | sarvatrāsau samastaṃ ca vasatyatreti vai yataḥ | tataḥ sa vāsudeva iti vidvadbhiḥ paripaṭhyate || sarvāṇi tatra bhūtāni vasanti paramātmani | bhūteṣu ca sa sarvātmā vāsudevastataḥ smṛtaḥ || iti ca viṣṇupurāṇe |